Drejtoresha e zhvillimit të aviacionit dhe marketingut, Manjola Kaso, e ftuar në “Aldo Morning Show” në Tv Klan, tha se gjatë këtij viti janë hapur mbi 11 destinacione të reja, duke përfshirë qytete si Bordo dhe vendet Baltike, ndërsa priten edhe disa linja të reja në muajin dhjetor.
Sipas Kasos, suksesi i aeroportit është rezultat i investimeve të vazhdueshme, veçanërisht në tre vitet e fundit, përfshirë një pistë të re ajrore, zgjerimin trefish të terminalit dhe ndërtimin e një parkingu modern në kohë rekord.
Investimet do të vazhdojnë me hapjen e një zone të zgjeruar me rreth gjashtë “gate” të reja, duke garantuar më shumë hapësirë dhe një udhëtim më komod për pasagjerët.
Manjola Kaso: Për vitin 2025 deri në fund të tetorit ne kemi mbi 10 milionë pasagjerë që është një arritje shumë e madhe. Përveç kësaj, gjatë këtij viti ne kemi futur mbi 11 destinacione të reja, duke filluar me Bordonë, vendet Baltike e shumë të tjera. Presim edhe disa linja të reja në dhjetor.
Aldo: Praktikisht ne kemi një aeroport të vogël, si arrin ky aeroport i vogël që të menaxhojë 10 milionë udhëtarë.
Manjola Kaso: Aeroporti ka pasur investime të vazhdueshme, sidomos në tre vitet e fundit. Është investuar në çdo cep të aeroportit, duke filluar që nga zona ajrore me një pistë të re ajrore, nga ana tjetër është trefishuar sipërfaqja e terminalit. Megjithatë ka nevojë për akoma më shumë zgjerim. Për më tepër ne jemi ende duke investuar në terminal dhe shumë shpejt për dy-tre muaj do kemi edhe një zonë tjetër të zgjeruar, me pothuajse gjashtë gate të reja, të cilat do u japin më shumë hapësirë pasagjerëve, jo vetëm me procesimin e tyre por edhe për një udhëtim më komod. Parkingu pastaj është një vlerë e shtuar, ku ne në një kohë rekord, me më pak se tre muaj kemi ndërtuar një parking. Parkuingu i ri është pothuajse ngjitur me terminalin, ka një lidhje të brendshme. Jemi duke punuar edhe për përmirësimin e sinjalistikave, që lidhin aeroportin me pjesën tjetër të akseve rrugore.