Skira Rudik, një deputete e Ukrainës ka folur këtë mëngjes për “skynews” lidhur me situatën në Mariupol, ku deklaroi se të paktën 30 fëmijë vazhdojnë të qëndrojnë akoma të bllokuar në uzinën e çelikut të Mariupolit.
Deputetja u shpreh se lajmi që thoshte se 156 persona nga fabrika e çelikut Azovstal kishin mbërritur të sigurtë në Zaporizhzhia, bëri që shumë të prekeshin e të përloteshin, duke vënë në dukje se kishte të paktën 20 përpjekje të dështuara.
“Mund ta imagjinoni se ne të gjithë ishim në lot kur grupi i parë arriti në siguri. Është përparim i jashtëzakonshëm që kemi bërë në nxjerrjen e njerëzve jashtë”, theksoi Rudik.
Deputetja shtoi se qëllimi kryesor tani është evakuimi i të gjithë fëmijëve që mbeten në uzinë, së bashku me gratë, të moshuarit dhe ushtarët e plagosur.
“Kështu që tani qëllimi ynë kryesor është të sigurohemi që t’i nxjerrim të gjithë fëmijët, janë rreth 30 fëmijë ende atje. Hapi më i ndërlikuar do të ishte me ushtarët e plagosur sepse Rusia nuk po i lejon ata të dalin jashtë”, u shpreh deputetja.