Anija e marinës italiane “Cassiopea” me 49 emigrantë ka mbërritur në portin e Shëngjinit mëngjesin e së martës. Ky është grupi më i madh që mbërrin në Shqipëri pas një ndërprerjeje prej dy muajsh. Emigrantët do t’i nënshtrohen procedurave të verifikimit dhe kontrollit shëndetësor në qendrën pritëse.
Disa herë qeveria italiane u ndalua nga gjykatat për të sjellë emigrantët në Shëngjin dhe kampin e Gjadrit. Ajo u fut në një betejë me gjyqësorin për shkak të listës së vendeve të origjinës dhe azilkërkuesve, e cila pretendonte se nuk duhet të ketë një listë të unifikuar për të gjitha shtetet e BE.
Më 30 dhjetor, gjykata e Kasacionit në Itali i dha të drejtë Giorgia Melonit dhe kabinetit të saj, të cilët pretendonin se secili shtet duhet të ketë një listë të personalizuar të vendeve të sigurta dhe të pasigurta.
Ndër të tjera për pjesën e listës të vendeve të sigurta, gjykata e Kasacionit tha se gjyqtarët e çështjeve të secilit rast nuk zëvendësojnë vlerësimin, i cili në përgjithësi është përgjegjësi vetëm e ministrit të Jashtëm dhe ministrave të tjerë.
Marrëveshja Shqipëri-Itali për trajtimin e emigracionit të paligjshëm është konsideruar një marrëveshje model nga BE, që mund të shërbejë si shembull për të zgjidhur çështjen e emigracionit të paligjshëm, me të cilën përballet unioni 27 anëtarësh.