Marrëveshja finale mes Kosovës dhe Serbisë, mund të arrihet në më pak se një vit. Kështu u shpreh një zyrtar i lartë i Bashkimit Europian, i cituar në kushte anonimiteti nga “Euroactive”, gjatë samitit që u zhvillua të martën në Tiranë.
Përfaqësuesi i posaçëm i BE-së, Miroslav Lajçak, u dorëzoi Prishtinës dhe Beogradit versionin e fundit të propozimit të Brukselit, i mbështetur nga Franca dhe Gjermania, që sipas “Euroactive”, ka një afat kohor dhe një kalendar veprimesh që duhet të kryhen nga të dyja palët.
“Pasi dëgjuam të dyja palët, ne rihartuam propozimin. Ai përfshin një aneks me një kalendar veprimesh mbi kohën dhe mënyrën se si duhet të ndodhin gjërat. Propozimi përbën një hap të madh përpara krahasuar me situatën aktuale. Nuk është njohje e plotë, por normalizim i plotë i marrëdhënieve”.
I pyetur lidhur me afatin kohor për implementimin e mundshëm të ujdisë, zyrtari i BE-së tha se ndërsa kjo do të varet nga vullneti i palëve, ka pritshmëri që mund të të ndodhë në më pak se një vit.
Gjatë samitit BE-Ballkani perëndimor, i mbajtur të martën në Tiranë, përfaqësuesi i lartë i politikës së jashtme tha se Prishtina dhe Beogradit duhet të shfrytëzojnë momentin, pasi aktualisht ekziston një mundësi e madhe pas arritjes së marrëveshjeve për targat.