Avokatja e Popullit, Erinda Ballanca në Komisionin e Ligjeve kërkon më shumë buxhet nga Ministria e Financave për këtë institucion. Buxheti i vitit 2024 për Avokatin e Popullit është 178,2 milionë lekë, por në seancën dëgjimore online, Ballanca tha se kjo shumë nuk i plotëson nevojat që ka ky institucion.
Për marrëveshjen e firmosur me Italinë për emigrantët, avokatja tha se do të lindë nevoja për më shumë staf. Për të nevojitet më shumë persona për monitorim se çfarë po ndodh me trafikun e emigrantëve dhe në rast se do lindë nevoja për refugjatët që do vijnë në Shqipëri pas marrëveshjes me Italinë.
”Në këto kushte, edhe më të rejat e fundit, marrëveshja e firmosur me Italinë dhe problemet që mund të kemi me migracion kërkon një numër shtesë në stafin e mekanizmit për parandalimin e torturës. Kërkesë që e kemi paraqitur dhe mendoj se është e domosdoshme për të ushtruar atë mandat që do na duhet ta ushtrojmë edhe në kuadër të ndryshimeve të reja dhe lëvizjeve më të mëdha të emigrantëve edhe për shkak të luftës në Gaza, çështje të karakterit gjeopolitik. Të shtonin staf në këtë grup, jemi të mbështetur nga UNHCR, prej disa vitesh me dy anëtar stafi dhe vitin e kaluar me 3 për të monitoruar kufijtë. Numri që kemi nuk është i mjaftueshëm, ata paguajnë staf nëpërmjet projektit për të monitoruar kufijtë, për të parë lëvizjet e emigrantëve. Mbetet problem i rëndësishëm se ca ndodh me trafikun brenda për brenda dhe garantim e të drejtave për azil. Marrëveshja mund të sjell nevojë për një vëmendjen më të shtuar lidhur me këtë”.