Shtetet e Bashkuara të Amerikës dhe Australia kanë nënshkruar një marrëveshje të re që synon të rrisë furnizimin me minerale të rralla dhe të tjera minerale kritike, në kuadër të përpjekjeve të administratës Trump për të kundërshtuar dominimin e Kinës në këtë treg.
Kryeministri australian, Anthony Albanese, tha se marrëveshja do të mbështesë një portofol projektesh “gati për zbatim” në vlerë prej 8.5 miliardë dollarësh (rreth 6.3 miliardë funta), të cilat synojnë të zgjerojnë kapacitetet e vendit të tij në fushën e nxjerrjes dhe përpunimit të mineraleve.
Sipas tekstit kornizë të marrëveshjes, të dyja vendet pritet të investojnë 1 miliard dollarë në projekte në SHBA dhe Australi brenda gjashtë muajve të ardhshëm.
Edhe pse bashkëpunimi në këtë fushë ka nisur që gjatë mandatit të parë të presidentit Trump, Albanese theksoi se marrëveshja e re e çon partneritetin në një “nivel të ri”.
Aktualisht, Kina kontrollon rreth 70 për qind të nxjerrjes dhe 90 për qind të përpunimit të mineraleve të rralla – elementë kyç për prodhimin e pajisjeve ushtarake, çipave kompjuterikë dhe makinave.
Kompanitë amerikane mbështeten në masë të madhe në këto materiale, duke u bërë të cenueshme, veçanërisht këtë vit, pasi Kina ka ndërmarrë hapa për të kufizuar qasjen në to si kundërpërgjigje ndaj tarifave të reja amerikane dhe tensioneve të tjera tregtare.
Sipas Albanese, marrëveshja synon të përshpejtojë investimet në tre lloje projektesh, përfshirë edhe investime amerikane në impiante përpunimi në Australi. Po ashtu, të dyja vendet janë pajtuar të bashkëpunojnë në çështje që lidhen me çmimet, licencimin dhe rregullat për shqyrtimin qeveritar të shitjeve të kompanive dhe projekteve në këtë sektor.Ndërkohë, SHBA-ja ka bërë të ditur se do të investojë në ndërtimin e një rafinerie të avancuar të galiumit në Australinë Perëndimore, me kapacitet prej 100 tonësh në vit, si dhe po përgatitet të ofrojë rreth 2.2 miliardë dollarë në financim për projekte me minerale kritike përmes Bankës së saj të Eksport-Importit.