Ish-nënkryetari i PD, Edmond Spaho, është shprehur në mbështetje të investimeve strategjike në turizëm, duke argumentuar se Shqipëria ka nevojë për projekte të mëdha që krijojnë vende pune dhe nxisin zhvillimin ekonomik.
Sipas tij, është shumë e vështirë të tërhiqen investime të përmasave të tilla dhe refuzimi i një investimi prej 4.5 miliardë dollarësh është i pajustifikueshëm.
Ai shtoi se, megjithëse zonat e mbrojtura janë sensitive, ekspertët më të mirë kanë rekomanduar zhvillimin e turizmit të nivelit të lartë. Si shembull, Spaho përmendi Sardenjën, ku sipas tij po ndërtohen dy resorte në zona të mbrojtura.
“Unë gjykoj mbi bazën e mendimeve të mia dhe pozicionohem. Nuk pranoj të më imponohen. Për Zvërnecin mendoj se kam eksperiencë më shumë se ata që ngrihen dhe flasin. Kam punuar për 5-6 vite në turizëm kur u hartua strategjia e zhvillimit të turizmit në Shqipëri.
Është e vështirë të thithësh investime të tilla. Të thuash që nuk e duam një investim 4.5 miliardë dollarësh është marrëzi. Edhe nga zhvillimet që janë bërë për mjedisin, të gjitha zonat janë sensitive, por ekspertët më të mirë kanë rekomanduar zhvillim të turizmit të nivelit të lartë.
Në Sardenjë po ndërtohen dy resorte në zona të mbrojtura. Çfarë do të ngelë Shqipëria, rezervat gjuetie? Si mund të ndërpritet emigracioni, me vende pune.”