Ish deputeti i LSI-së Vangjel Tavo ka reaguar me një status në Facebook lidhur me rinisjen e hetimeve për Masakrën e Peshkëpisë, për të cilën është marrë në pyetje Fredi Bejleri, që iu mohua kandidimi për kryetar bashkie nga KQZ dhe të tjerë persona.
Tavo thotë se rikthimi i çështjes 25 vite më vonë në një kohë që vendi është në një krizë të brendshme minoriteti grek nuk duhet të kthehet në shënjestër, apo rrugëdalje nga qoshsokaket e ngushta politike. Tavo e sheh këtë si një kundërvënie etnike.
POSTIMI I VANGJEL TAVOS
25 vite më vonë rikthehet çështja e Masakrës së Peshkëpisë. Ditët e fundit Prokuroria e Krimeve të Renda po thërret në pyetje disa pjesëtarë të minoritetit etnik grek. Përse tani?
Kriza e brendshme në vend kërkon diversion duke e zhvendosur vëmendjen në kurriz të minoritetit grek? A po përdoret drejtësia nga qarqe të caktuara politike? Minoriteti grek nuk mund të jetë kurrësesi as shënjestër dhe as rrugëdalje nga qoshsokaket e ngushta politike. Ky është një terror artificial dhe një shpresë për kundërvënie etnike. Njëri kah politik mund të dëshirojë prishjen e harmonisë politike por nuk duhet të gjejë shpëtimin duke u përpjekur të zhbëjë harmoninë dhe bashkëjetesën etnike.
Drejtësia të qëndrojë larg orientimit politik dhe të mos bëhet vegël e saj.
Harmonia dhe bashkëjetesa etnike ka prevaluar ndër shekuj, e do prevalojë edhe
ndaj këtyre përpjekjeve artificiale të ditëve të fundit.