Gjykata e Shkodrës ka vendosur masën e sigurisë arrest me burg për dy të plagosurit Hasan Ferracaku dhe Elmidin Dyli, të cilët u përfshinë në përplasjen me armë në Velipojë, ku humbën jetën 4 persona.
Masa e sigurise është dhënë në ambientet e spitalit të Truamës mëngjesin e kësaj të enjtes, ku dy të pandehurit po marrin mjekim si pasojë e plagëve të marra.
Nga përplasja me armë që ndodhi në Velipojë, e cila nisi për ndarjen e plazhit mes dy familjeve Ferracaku dhe Gocaj, mbetën të vrarë 4 persona.
Në vendngjarje u gjetën të vdekur vëllezërit Edmond dhe Xhovani Gocaj, si dhe Kujtim Ferracaku dhe Musaen Zeneli, ndërkohë që u plagosën Hasan Ferracaku dhe i mituri Dyli.
Për ngjarjen mbeten ende në kërkim tre djemtë e Hasan Ferracakut që po ashtu dyshohen si të përfshirë në përplasjen me armë.
Referuar hetimeve, në këtë ngjarje u përdorën 4 armë, tre pistoleta dhe një armë kallashnikov. Prokuroria nuk e ka sekuestruar ende armën tip kallashnikov. Sipas materialit referues, në vend ngjarje u sekuestruan 13 gëzhoja të plasura si dhe 5 gëzhoja të paplasura, apo të dëmtuara.
Dyshimet janë se Ferracakët kanë qëlluar të parë mbi Edmond Gocajn, ndërkohë që Xhovani Gocaj është kundërpërgjigjur me armë duke vrarë Kujtim Ferracakun, e më pas ka mbetur viktimë edhe vetë.
Ndërkohë që sa i takon të riut Musaen Zeneli, ai është viktima më e pafajshme e kësaj historie, pasi u vra në ditën e tij të parë të punës, pa qenë i përfshirë fare në konflikt.
Ai ishte i punësuar në lokalin e familjes Gocaj, ku ndodhi dhe konflikti i armatosur.