Enkeledja Zaçe, e vetmja grua e akuzuar në ngjarjen e rëndë të 14 Korrikut 2016 në Francë, vijon të mohojë akuzat se ishte e përfshirë në sulmin që i mori jetën 86 personave. 48-vjeçarja me origjinë shqiptare, nënë e tre fëmijëve, u arrestua më datën 17 Korrik për t’u ndjekur penalisht më pas, ndërsa ende vijon gjyqi për të faktuar fajësinë e saj.
“Unë kurrë nuk kam shitur armë, nuk kam qenë kurrë në këtë organizatë. Unë kam punuar gjithmonë në Francë, në një sallon për pastrimin e ushqimit. Babai dhe nëna ime vdiqën, më lanë trashëgiminë. Doja të kisha një jetë familjare si gjithë të tjerët, por jeta ime ndryshoi. Kur kjo ndodhi, humba gjithçka, gjithçka. Kam humbur gjithçka”, mësohet të ketë thënë ajo para gjykatësit.
Ndonëse Zaçe ka mohuar përfshirjen, dy nga tetë të akuzuarit e tjerë, Ramzi Arefa dhe Artan Henaj kanë deklaruar se ajo ishte e pranishme më 12 Korrik 2016, kur u dorëzua pistoleta e përdorur nga vrasësi në mbrëmjen e atentatit në Nice. Gjithashtu dyshohet se ajo ishte aty dhe më 13 Korrik për dorëzimin e kallashnikovit dhe në dorëzimin e armëve të tjera.
Enkeledja që u largua nga Shqipëria në moshën 16-vjeçare, vazhdon të deklarojë pafajësinë e saj, megjithëse rezulton e përfshirë edhe në trafikun e drogës. Më 15 Qershor 2018, ajo u burgos në qendrën e paraburgimit në Nice për më shumë se 5 muaj. Në Itali nuk është e panjohur për shërbimet e policisë pasi hetuesit vërtetuan se ajo ishte e përfshirë në trafikun e klandestinëve.