Sipas Prokurorisë, hetimet nisën pas sigurimit të informacioneve operative mbi funksionimin e një call center-i të paligjshëm në zonën e Zallit, Selitë, në Tiranë. Gjatë kontrollit të ushtruar në ambientet e dyshuara, u konstatua prania e të akuzuarve dhe punonjësve të tjerë, të sistemuar në poste pune të organizuara si zyra.
Nga hetimet ka rezultuar se Klaudio Sulejmëni dhe Franko Karemani rekrutonin punonjës dhe i trajnonin për zbatimin e një skeme mashtrimi të njohur si “Recovery”. Sipas organit të akuzës, ata kontaktonin me telefon shtetas të huaj, të cilët më parë kishin humbur para në investime ose në skema të tjera mashtruese, duke u premtuar se do t’i ndihmonin për rikuperimin e fondeve të humbura.
Prokuroria bën me dije se agjentët mblidhnin informacion mbi viktimat, mënyrën se si kishin humbur paratë, si dhe kompanitë me të cilat kishin bashkëpunuar më herët. Më pas, klientët viheshin në kontakt me persona të prezantuar si “ekspertë”, ndërsa komunikimi vijonte nga Klaudio Sulejmëni dhe Franko Karemani.
Në përfundim të hetimeve, Prokuroria ka dërguar në gjyq Klaudio Sulejmënin dhe Franko Karemanin për veprën penale “Mashtrimi kompjuterik”, ndërsa Eriglen Arapin për veprën penale “Moskallëzim i krimit”.