Në fushatën e zgjedhjeve politike të qershorit 2009 Partia Demokratike u mburr dhe e bazoi gjithë fushatën në ndërtimin e rrugës Zenisht-Urakë, madje atë e pagëzuan me emrin “Koridori i Matit”. Drejtuesit lokal të PD-së dhe kandidatët për deputetë deklaruan se ky “koridor” do të bashkonte Rrugën e Kombit me atë të Arbërit. Për ta bërë fakt të kryer demokratët varën një banderolë pranë Urës së Matit, në fshatin Zenisht.
Vite më para ky aks i rëndësishëm u ndërtua, por rruga mbeti në mëshirë të fatit, pa pronarë dhe pa mirëmbëjtje. Mjetet e tonazhit të lartë, mungesa e kanaleve ansore, rrëshqitjet, agjentët atmosferikë e dëmtuan trasenë e rrugës në shumë segmente të saj. Rruga mbeti jetime ndërkohë miliona lekë shkuan dëm.
Por situata vijon të mbetet kritike në këtë rrugë pasi ka dëmtime kudo. Pjesa më problematike mbetet ajo në afërsi të urës së Urakës, në Perlat, në fshatin Zenisht e Shoshaj. Drejtuesit e mjeteve shprehen se gjendja e rrugës u shkakton kosto të mëdha në mjetet e tyre.
Aksi rrugor në fjalë është një investim i qeverisë shqiptare dhe Fondit Shqiptar të Zhvillimit, por me reformimin territorial të vitit 2015 kjo rrugë nuk u kalua në inventar të pushtetit vendor, por as ARRSH nuk pranoi ta kishte në inventar.
