Sipas drejtorit të bujqësisë pranë Bashkisë Mat, Agron Hastoçi, vijon të jetë aktive prej tre ditësh një vatër zjarri në pyjet e Gërmanit, Njësia Administrative Komsi.
“Eshtë punuar për shuarjen e zjarrit në malin e Gërmanit, ku zjarri është përhapur në jug-perëndim të malit Skenderbeg, në një terren tepër të thyer, ku forcat njerëzore e kanë të pamundur ndërhyrjen pasi u rrezikohet jeta. Në pjesën lindore është punuar dhe sot, ku është izoluar për të avancuar zjarri drejt liqeneve të Batrrës. Mbi Fushë Tanë zjarri është aktiv dhe po zbret mbi shtëpinë e Ali Friskut”, sqaron Hastoçi.
Sot u angazhuan të paktën 80 forca ushtarake, të ardhur nga repartet e Burrelit dhe Tiranës, punonjës të Bashkisë Mat, zjarrfikës, efektivë policie, banorë të zonës, etj.
Sipas Hastoçit, nesër ndërhyrja duhet të nisë nga Fushë-Tana dhe nga liqeni i Gërmanit, me forcat e ushtrisë dhe bashkisë.
