Teksa vijon numërimi i votave për këshillin bashkiak Mat, një votues i qytetit të Burrelit, ka shprehur jo vetëm vullnetin si zgjedhës, por ka lënë dhe një letër në kutinë e votimit.
Në fillim të letrës qytetari matjanë shprehet se ka mbështetur Partinë Demokratike për tre dekada dhe zyrtarët e kësaj force politike nuk e kanë mbështetur kurrë.
“Për 30 vite demokraci familja ime investoi në Partinë Demokratike. Me këtë frymë na rritën edhe ne fëmijëve. Ne besuam dhe u zhgënjyem pas çdo zgjedhje”, shprehet qytetari.
Ndryshe nga 8733 zgjedhes që kanë votuar kryebashkiakun Agron Malaj, ky qytetar e ka lënë me shkrim se kujt ia ka besuar votën me 14 maj.
“As dera e bashkisë nuk na u hap. Askush nga ne nuk figuroj i punësuar. Jam një demokrat i flakët dhe sot mbështes z.Agron Malaj. Në këto 4 vite kam parë një bashki që i hapet dera çdo qytetari pa dallime partiake. Kam parë një kryetar fisnik, të thjeshtë dhe popullor që i bashkohet halleve të qytetarëve”, shton votuesi i zhgënjyer keq me PD-në.
