Vetëm pak ditë pas fitores së thellë të zgjedhjeve lokale të 14 majit kryebashkiaku i Matit Agron Malaj zhvilloi 7 takime falenderuese në njësitë administrative, Macukull, Derjan, Rukaj, Lis, Ulëz, Baz e Komsi, ndërkohë nesër falenderimet do të vijojnë në qytetin e Burrelit ku pritet edhe kryeministri Edi Rama.
“Ju falenderoj pa masë për mbështetjen që më dhatë në zgjedhjet e fundit lokale, u tha Malaj zgjedhësve matjanë. Kjo mbështetje e madhe më imponon të punoj akoma më shumë, për rritjen e mirëqenies së qytetarëve, për vijimin e investimeve, sidomos në rrugët e fshatrave”.
Në takimin falenderues me votuesit e Macukullit kryetari Agron Malaj tha se vjen vetëm pak ditë pas zgjedhjeve për të rikonfirmuar se rruga Burgajet-Derjan-Macukull do të shtrohet me asfalt dhe se premtimi i dhënë para zgjedhjeve nuk ishte për fushatë elektorale.
“Jeni i pari kryetar bashkie që pasi fitoni mandatin vini dhe takoni zgjedhësit. Ju keni bërë shumë punë dhe ne e vlërësojmë shumë atë. Kemi besim se edhe gjatë këtij mandati investime të tjera do të kryhen në bashkinë e Matit”, u shprehën banorët e kësaj bashkie.