Sot, në ambientet e Bashkisë Mat është zhvilluar mbledhja e Këshillit Vendor të Sigurisë Publike. Ky organ, i cili është ngritur në vitin 2018, u mblodh për herë të parë në këtë bashki, takim ky që vjen si nevojë ligjore e parashikuar në Ligjin “Për Vetëqeverisjen Vendore” dhe do të kryesohet nga vetë Kryetari i Bashkisë, Agron Malaj.
Në këtë takim, krahas kryetarëve të bashkive Mat e Klos, morën pjesë gjithashtu edhe përfaqësues të tjerë nga dy bashkitë, nga institucionet kryesore vendore dhe vetë Drejtori i Zyrës së Koordinatorit Kombëtar për Çështjet e Ekstremizmit të Dhunshëm, Agron Sojati, i cili është në varësi direkte të kryeministrit Edi Rama.
Qëllimi dhe tema e këtij takimi kishte në qendër të vëmendjes radikalizmin dhe ekstremizmin e dhunshëm për Bashkitë e Matit dhe Klosit. Në mbledhje u diskutua për fuqizimin dhe ngritjen e kapaciteteve për aktorët e vijës së parë që operojnë në këtë komunitet (mësues, oficerë të policimit në komunitet, punonjës socialë, psikologë, mjekë, administratorë socialë, koordinatorë të njësive të mbrojtjes së fëmijeve, etj). Takime të tilla informuese/ndërgjegjësuese të mbështetura edhe nga prezenca e OSBE-së në Tiranë kanë në fokus të tyre Këshillat Vendorë të Sigurisë Publike (KVSP), të cilat sipas raportimeve institucionale rezultojnë të ngritura, por mbetet vetëm konsolidimi i tyre. /tirananews.al/
