Tërmeti i ditëve të fundit dhe moti i keq kanë dëmtuar më shumë se 100 banesa në Bashkinë e Matit. 94 objekte janë shtëpi banimi, ndërkohë 6 objekte të tjera janë publike, kryesisht shkolla.
Në Shtabin e Emergjencave Civile u raportua sot se është shembur shtëpia e Ferit Hysës, 53 vjeç, banor i fshatit Rukaj, një qytetar me probleme të shëndetit mendor.
Prej vitesh autoritetet lokale janë përpjekur ta strehojnë diku apo ta sistemojnë në spitalet e të sëmurëve mendorë, por Hysa nuk ka pranuar.
Specialistë të Mbrojtjes Civile dhe të Njësisë Administrative Rukaj janë ndodhur në vendin e ngjarjes dhe kanë marrë masa për strehimin e Ferit Hysës pranë të afërmëve të tij, por ai e refuzon një gjë të tillë.
Të tjera ankesa janë paraqitur pranë Bashkisë për dëmtimin e çative, oxhaqeve, pemëve, urave, rrugëve, digave të rezervuarëve, etj dhe po shqyrtohen nga autoritetet vendore.
