Zëvendësues në Kombëtare, por titullar i padiskutueshëm me Grojter Fyrth. Situata e Mërgim Mavrajt ka ndryshuar plotësisht brenda pak ditësh, pasi është kthyer në klubin e tij ku e shohin si një element të rëndësishëm në tentativën për të synuar ngjitjen në elitën e futbollit gjerman.
Mavraj ka qenë titullar sot në ndeshjen e rëndësishme përballë Vehen, duke ndihmuar ekipin e tij që të siguronte një sukses 2-1, edhe pse Grojter Fyrth vuajti pak më shumë sesa mendohej në duelin në fjalë. Miqtë shënuan të parët që në startin e pjesës së dytë kur gjetën të parreshtuar mirë Mavraj&Co. dhe ishin në avantazh deri në minutat e fundit të takimit.
Por një gol në minutën e 81-të hapi ndeshjen dhe penalltia e Grin në minutën e 91-të i dha suksesin Grojter Fyrth duke e ngjitur përkohësisht në vendin e tretë në renditjen e Bundesligës 2. Një lajm i mirë për Mavrajn pas javës ku pa të përballej me kritika e të humbte vendin në rreshtimin e përfaqësueses shqiptare, i lënë në stol edhe atëherë kur Kombëtares i nevojitej kontributi i mbrojtësve për dëmtimet e Gjimshitit dhe Hysajt në pjesën e dytë kundër Francës. Mbrojtësi ka një muaj kohë për të bindur Rejan se e meriton përsëri të jetë titullar, sigurisht duke treguar me klubin e tij se nuk është në krizë.