Një ngjarje e rëndë ka ndodhur pasditen e sotme në fshatin Bushkash të njësisë administrative Ulëz.
Shtatë punonjës të ndërmarrjes së rrugëve rurale janë mbajtur të bllokuar në qendër të fshatit për të paktën katër orë.
Banorët u shprehën se e ndërmorën këtë akt sepse ata nuk përfunduan punimet për shtrimin e rrugës më cakëll, por i lanë ato përgjysëm.
“Punonjësit e bashkisë punuan dy-tri orë në rrugën kryesore të fshatit. Nuk patën kryer as gjysmën e punimeve dhe dy fadroma dhe dy mjete transporti nisën kthimin drejt Burrelit. Ne i ndaluam dhe u kërkuam të përfundojnë punimet e nisura, sic ishte premtuar nga kryetari i bashkisë”, sqaruan burime pranë pleqësisë së fshatit Bushkash.
Bashkia ka kërkuar ndihmën e Policisë për zgjidhjen e situatës. Më shumë se dhjetë efektivë Policie, drejtues të Drejtorisë së Policisë Dibër dhe të Komisariatit Matit kanë ndërhyrë dhe kanë kryer transportin e punonjësve të Bashkisë, ndërsa mjetet janë mbajtur të bllokuara nga të paktën 70 banorë të fshatit, me pretendimin se ato nuk do të lëvizen pa mbyllur punimet e nisura. Banoret thane se punonjesit e bashkise kishin konsumuar shume alkool.
Një tjetër proteste e banorëve të fshatit Mallunxë u zhvillua sot në mjediset e bashkisë Mat, duke kërkuar zgjidhjen e problemeve të mbartura.