Numri i të prekurve nga koronavirusi në Shqipëri ka shkuar në 38 me 5 rastet e reja të konfirmuara sot.
Nga të dhënat e publikuara prej Ministrisë së Shëndetësisë, vatrat kryesore të koronavirusit në Shqipëri janë në Tiranë, Durrës dhe sëfundmi në Fier.
12 prej të prekurve janë të shtruar tek reparti Infektiv në Tiranë, madje siç bën me dije ministria, dy prej tyre janë në terapi intensive.
Mësohet se një 66 vjeçar nga Lushnja është në gjendje tepër të rendë dhe po mbahet në jetë përmes aparaturave në repartin Infektiv të QSUT-së.
Gjendja e tij u përmend edhe nga kryeministri Rama mesditën e sotme, në të cilën shefi i qeverisë njoftoi për ndalimin e qarkullimit të qytetarëve në parqe.
66 vjeçari është nga Lushnja dhe është një vatër e pavarur nga të tjerat në qarkun e Fierit. Edhe ai ka qenë në Itali dhe është kthyer nga andej ditët e fundit.
Shqipëria shënoi viktimën e parë nga koronavirusi dy ditë më parë. Bëhet fjalë për një 73 vjeçare nga Durrësi, e cila ndërroi jetë në spital duke infektuar disa familjarë dhe një mjek të këtij spitali.