Kryetari i bashkisë së Gramshit, Besian Ajazi zhvilloi këtë pasdite një takim me përfaqësues të strukturave qëndrore dhe lokale të emergjencave civile, me fokus koordinimin e planit të masave për përballimin e situatës së zjarreve në njësinë administrative Skënderbegas. Në takim morën pjesë Drejtori i Përgjithshëm i Agjencisë së Mbrojtjes Civile, Haki Çako, Prefekti i Qarkut Elbasan, Ilir Bejtja, Gjenerali i Forcës Tokësore, Ilir Xhebexhia, si dhe përfaqësues nga strukturat përkatëse të sistemit të mbrojtjes civile.
Takimi kishte për qëllim përforcimin e bashkëpunimit ndërinstitucional dhe koordinimin efektiv të veprimeve për izolimin e plotë të flakëve dhe rikthimin e normalitetit në zonat e prekura nga zjarret. Situata nga zjarret në zonën e Gramshit mbetet kritike, me disa vatra aktive që vijojnë të përhapen në territorin e bashkisë.
Në njësinë administrative Skënderbegas, zjarri i nisur në fshatin Kullollas është përhapur edhe në drejtim të fshatrave përreth, përfshirë zonën e Harunasit. Flakët po avancojnë në drejtim të fshatit Nartë, ku autoritetet kanë dhënë njoftim për evakuim, për shkak të rritjes së intensitetit të zjarrit dhe rrezikut ndaj banesave. Situatë problematike paraqitet edhe në njësinë administrative Kukur, ku vatra aktive zjarri vijojnë në fshatrat Mukaj dhe Sojnik, duke djegur sipërfaqe me shkurre dhe bimësi të ulët.
Forcat zjarrfikëse të Elbasanit dhe Gramshit, të mbështetura nga punonjës të bashkisë dhe banorë të zonës, janë në terren pranë fshatrave Snosëm dhe Sojnik për të frenuar përhapjen e flakëve. Autoritetet vijojnë të mbajnë në gatishmëri strukturat operacionale dhe i bëjnë thirrje banorëve të ndjekin udhëzimet për sigurinë, duke raportuar menjëherë çdo vatër të re zjarri.