Gjatë muajit janar 2026, mbi 20 mijë vizitorë vendas dhe të huaj kanë frekuentuar sitet kulturore në Shqipëri, duke reflektuar një interes të qëndrueshëm për trashëgiminë kulturore të vendit.
Të dhënat janë bërë publike nga ministri i Turizmit, Kulturës dhe Sportit, Blendi Gonxhja, i cili bën me dije se gjatë këtij muaji muzetë kombëtarë janë vizituar nga 11,315 persona. Ndërkohë, parqet arkeologjike kanë tërhequr 6,012 vizitorë, ndërsa kalatë dhe monumentet kulturore janë vizituar nga 2,693 persona.
Sa u përket siteve më të frekuentuara, në vend të parë renditet Muzeu Kombëtar “Gjergj Kastrioti Skënderbeu” në Krujë, me 4,948 vizitorë. Pas tij vjen Parku Arkeologjik i Shkodrës, i cili ka pritur 3,475 vizitorë, si dhe Kalaja e Gjirokastrës me 2,167 vizitorë.
Në listën e pesë siteve më të vizituara përfshihen gjithashtu Muzeu Ikonografik “Onufri” në Berat, me 1,604 vizitorë, dhe Parku Arkeologjik i Butrintit, i cili gjatë janarit është vizituar nga 1,100 persona.