Fermerët në të gjithë vendin kanë treguar interes të lartë për të përfituar nga Skema Kombëtare e Mbështetjes në Bujqësi. Sipas të dhënave zyrtare, deri tani janë regjistruar mbi 32 mijë aplikime, ndërsa kanë mbetur vetëm edhe tre ditë nga përfundimi i afatit.
Skema parashikon një financim prej 10 mijë lekësh për hektar për sipërfaqet e mbjella me kultura bujqësore, me kusht që fermeri të disponojë të paktën 3 hektarë tokë të kultivuar.
Ndërkohë, fermerët që kultivojnë mbi 10 hektarë do të përfitojnë mbështetje shtesë prej 50%. Përparësi në skemën e këtij viti u është dhënë Shoqërive të Bashkëpunimit Bujqësor, të cilat parashikohet të mbështeten me financim 100%.
Aplikimet për masat direkte realizohen online përmes portalit e-Albania, ndërsa për masat e investimeve dokumentacioni duhet të dorëzohet fizikisht pranë zyrave qendrore të AZHBR-së.
Skema Kombëtare 2026 përfshin gjithsej 9 masa direkte dhe 3 masa investimi. Ndryshimet e reja parashikojnë lehtësira edhe për sektorin e blegtorisë, duke përgjysmuar numrin minimal të bagëtive që duhet të ketë një fermer për të përfituar mbështetje.
Për çdo lopë, blegtorët me tufa prej të paktën 5 krerësh do të përfitojnë 12 mijë lekë për krerë. Ndërsa për të imtat, subvencioni është rritur nga 1.200 në 1.500 lekë për krerë.