Mbledhja e radhës e komisionit parlamentar të medias ishte për të dëgjuar kandidatët për anëtarë të Këshillit Drejtues të RTSH-së, dhe ishte mbledhja e parë nën drejtimin e kryetarit të ri, Ramazan Gjuzi.
Ky i fundit u bë i famshëm pak ditë më parë për sjelljen e tij të pahijshme të gishtit në hundë gjatë mbledhjeve online. Por duket se nuk ka arritur ta përballojë drejtimin e mbledhjes.
Me deputeten Mirela Kumbaro në krah, Ramazan Gjuzi në pjesën më të madhe të mbledhjes u duk sikur nuk mund ta përballonte debatin dhe sidomos kundërshtitë nga ish-kryetarja Fatjona Dhimitri.
Gjatë mbledhjes përtej raportimeve të kandidatëve për anëtarë të Këshillit Drejtues të RTSH nuk munguan edhe lapsuset nga deputetët.
DISKUTIMI NË KOMISION
Ramazan Gjuzi: Fillojmë me kuorumin, Mirela Kumbaro, Musa Ulqini, Fidel Ylli, Vilma Belllo, Fadil Nasufi…
Fidel Ylli: Fadili vjen për 5 minuta, se ishte në një varrim dhe është rrugës. Është duke ardhur se i kishte vdekur tezja.
Ramazan Gjuzi: Fatjona Dhimitri, Kostaq Papa është?
Kostaq Papa: Jam, jam, unë ju shoh dhe ju dëgjoj, por ju nuk më shihni…
Ramazan Gjuzi: Kuorumi plotësohet… Kemi seancë dëgjimore me 3 kandidatë për anëtarë të Këshillit Drejtues të RTSH
Fatjona Dhimitri: A mund ta marr fjalën për procedurë? Ne kemi diskutuar që në këto kushte të pandemisë të mos u jepej përparësi këtyre çështje, por emergjencave. Situatë emergjente që duhej të diskutohej sot është përdhunimi i vajzës 15-vjeçare nga roja monstër i shkollës dhe sot duhet të ishte ministrja e Arsimit për të raportuar.
Mirela Kumbaro: Atëherë, me gjithë respektin për ju, dua të sjell në vëmendje që kur znj.Dhimitri ka qenë kryetare, ne këtë çështje e kemi diskutuar dhe ka qenë e parashikuar
Fatjona Dhimitri: Nuk ma mbyll dot gojën mua…
Mirela Kumbaro: Të lutem, vazhdojmë me seancën se po na presin kandidatët. Vazhdo me procesverbalin (i drejtohet kryetarit të komisionit)
Ramazan Gjuzi: Fillojmë me pikën 1 të rendit të ditës. Për procesverbalin e datës 19 maj 1920, ndjesë, 2020, ka ndonjë vërejtje? Fjalën e ka z.Ulqini si relator i çështjes.
Mirela Kumbaro: Biem dakord, besoj, që z.Ulqini të jetë relator i çështjes?
Fatjona Dhimitri: Ma keni ndërprerë lidhjen. Mos i bëni këto gjëra! Mirela, mos lër nam.
Mirela Kumbaro: Znj.Dhimitri, faleminderit, të mos bërtasim, por të vazhdojmë mbledhjen. Kemi një vit që e tërheqim zvarrë këtë çështje dhe sot jemi këtu për të vazhduar punën si kudo. Unë mendoj që të vazhdojmë mbledhjen.
Fatjona Dhimitri: Znj.Kumbaro, ndjesë, por dua fjalën për procedurë. Më dëgjoni?
Mirela Kumbaro: Me qetësi, nuk kemi nevojë të ulërasim…
Fatjona Dhimitri: Dua të di se nuk po e kuptoj kush po e drejton komisionin? Ju apo z.Gjuzi? E keni parë veten aty si dukeni?
Mirela Kumbaro: Unë nuk po drejtoj komisionin, por po bisedoj me kolegët.
Fatjona Dhimitri: Jo. Ti ke marrë komisionin në dorë.
Mirela Kumbaro: Qetësohuni se edhe ju, kur keni drejtuar mbledhjen e parë, keni kërkuar ndihmën e nënkryetares, se është çështje eksperience. Buzëqeshni e qetësohuni.
