Një ditë pas vendimit të Presidentit Meta, për të anuluar zgjedhjet e 30 qershorit, dhe një ditë para konferencës për shtyp që Meta do të mbajë në orën 8 të mëngjesit të nesërm, deputetët e rinj të LSI në Kuvend janë bërë bashkë në një takim në qytetin e Durrësit.
Këtë e ka bërë të ditur deputeti Lefter Koka me anë të një fotoje të shpërndarë në rrjetet sociale ku shihen së bashku deputetët e LSI. Koka ka dhënë edhe një mesazh për kundërshtarët politik madje edhe për anëtarët e LSI që janë jashtë Kuvendit duke thënë se Shqipëria do të ecë vetëm përpara.
“Shqipëria do të ecë vetëm përpara! I detyrohemi shqiptarëve, rrugën e pakthyeshme të integrimit euro-atlantik të atdheut!” shkruan Koka.
Ndërkohë i kontaktuar nga Shqiptarja.com, deputeti i LSI, Ralf Gjoni ka deklaruar se nuk ka ende një qëndrim për vendimin e Presidentit Meta për të anuluar zgjedhjet. Më pas ai ka shtuar së dreka ishte e planifikuar për krijimin e grupit të LSI-së.
“Nuk kemi qëndrim ende. Të dielën Zoti e ka bërë pushim. Ne jemi mbledhur në një drekë të planifikuar kohë më parë për të festuar krijimin e Grupit të Pavarur. Gjatë ditëve në vazhdim do qartësojmë edhe qëndrimin tonë në parlament” ka thënë ndër të tjera Ralf Gjoni.