Injacio La Rusa, themeluesi i “Vëllezërve të Italisë”, partisë nacionaliste me rrënjë fashiste është zgjedhur në krye të Senatit, në të parën mbledhje të dy dhomave të parlamentit të dalë nga zgjedhjet e përgjithshme të 25 Shtatort.
Në seancën që u hap nga senatorja e përjetshme dhe më e vjetër Liliana Segre, një e mbijetuar e Holokaustit. 75-vjeçari u zgjodh me 116 vota, kur nevojiteshin 104 me një shumicë të thjeshtë. Por mbledhja e parë e parlamentit tregoi se shumica qeverisëse mes Xhorxha Melonit, Mateo Salvinit dhe Silvio Berluskonit është edhe më e brishtë se ç’mendohej.
Mediat italiane shkruajnë se ishte votimi i fshehtë që solli në krye të senatit La Rusan, pasi Berluskoni urdhëroi senatorët e partisë së tij Forca Italia të mos e votojnë.
Tensionet mes ish-kryeministrit dhe kreut të ri të senatit u fiksuan edhe në këtëfilmim gjatë një debati në sallë. Mosmarrëveshjet lidhen me pakënaqësitë e Berluskonit për postet ministrore në qeverinëe re.
Përçarjet u shfaqën edhe në dhomën e ulët ku pavarësisht kandidaturave të shumta, dështuan dy raundet e para të zgjedhjes së kreut të ri. Kushtetuta parashikon që qeveria e re të zgjidhet pa mbaruar Tetori.