Pasi opozita bllokoi për 4 orë foltoren e Kuvendit, deputetët u mblodhën pasdite për të votuar rendin e ditës. Në sallë erdhi edhe kryeministri Edi Rama, për të votuar amnistinë penale, e cila kaloi me 84 vota pro.
466 persona do të lirohen menjëherë nga burgu, nga të cilët 11 janë gra dhe 1 i mitur. Ndërkohë, 869 persona do të përfitojnë ulje dënimi, mes tyre 8 gra dhe 1 i mitur.
Nga amnistia do të përfitojnë burrat që deri më 31 maj 2026 janë dënuar me vendim të formës së prerë deri në 3 vite burg ose u kanë mbetur pa vuajtur deri në 3 vite dënim, si edhe gratë e dënuara deri në 4 vite burg ose të cilave u kanë mbetur pa vuajtur deri në 4 vite dënim. Nuk përfitojnë subjektet e SPAK dhe GJKKO.
Opozita e cila nuk lejoi zhvillimin normal të seancës duke mbajtur të bllokuar për gati 4 orë foltoren, nuk është e pranishme në Kuvend.
Deputeti Agron Shehaj u përjashtua pasi po pengonte procesin e votimit, me thirrjet Rama jep dorëheqjen.