Agjencia e mbikëqyrjes policore i kërkon prokurorisë së Tiranës që të kryejë hetime ndaj disa oficerëve të policisë që dyshohen se ushtruan dhunë ndaj një të mituri gjate orëve të fundit.
I mituri u shoqërua ne komisariat menjëherë sapo përfundoi shkollën, teksa u konstatua se po drejtonte një automjet pa dokumenta.
17 vjeçari K.J dyshohet se u pyet pa praninë e psikologëve dhe pa vënë në dijeni prindërit ashtu siç kërkon ligji për të miturit. Veç kësaj, akuza është se fëmija gjatë marrjes pyetjes u qëllua me shuplaka në fytyrë.
Dy të miturit u dorëzuan në komisariatin e Kamzës nga forcat Shqiponja mbasi K.J po ngiste mjetin pa leje drejtimi dhe kishte si pasagjer edhe bashkëmoshatarin e tij gjithashtu edhe ai i shoqëruar.
Në makine policia gjeti një biçak që më pas u konstatua se nuk i plotësonte kushtet e armës së ftohtë. Veç pyetjes së dy të miturve që rrëfejnë se çfarë ndodhi në komisariat, veprimet arbitrare i pranon edhe njëri nga oficerët që e shoqëroi K.J në komisariat.
Oficeri A.Shima thotë se një agjent civil iu afrua te miturit K.J duke e pyetur ku rri,më ke ikur njëherë, më ke bërë zbor -i tha agjenti dhe pastaj e qëlloi me pëllëmbë në fytyrë. Efektivi Shima pohon se ndërhynë për ta qetësuar kolegun që më pas e kanë larguar nga salla.
Për vitin 2021 u referuan për hetime 39 oficere policie kryesisht të forcave shqiponja dhe të rendit të dyshuara se kapërcyen detyrën duke ushtruar dhunë.