Kreu i Partisë së Lirisë, Ilir Meta nuk i ka kursyer sulmet ndaj qeverisë Rama në fjalën e tij gjatë protestës së zhvilluar ditën e sotme tek Inceneratori i Tiranës. Ai kërkoi nga SPAK që të nisë hetimet për këtë aferë.
“U bënë 558 ditë të denoncimit zyrtar për këtë aferë kriminale dhe drejtësia nuk vepron. Jemi këtu për të treguar me gisht këtë vend krimi, që SPAK ta heqë atë shaminë që i ka vënë Rama para syve. Të zbatojë ligjin dhe të bëjë detyrën. Të çojë hajdutët dhe rilindësit pas hekurave”, tha ai.
Meta u shpreh se drejtësia duhet të bëjë detyrë dhe të zbardhë aferën e inceneratorëve, ndërsa i bëri thirrje administratës që mos të përdoret nga kryeministri Edi Rama.
“Jemi këtu për t’u bërë thirrje punonjësve të administratës, mos u përdorni nga Rama dhe mos u bëni bedel për interesat e tij. Zbatoni ligjin, ora e drejtësisë po vjen sepse populli shqiptar nuk ka më çfarë humbet. Ju falënderoj për këtë pjesëmarrje, për qytetarinë tuaj dhe jam i sigurt se përmes protestave do të vendosim demokracinë. Në një vend ku institucionet kanë rënë për shkak të iligjitimitetit e vetmja mënyrë për të vendosur demokraci është ngritja e popullit”, tha Meta.