Teksa gazetari i Vizion Plus, Thimi Samarxhiu i drejtoi një pyetje kreut të shtetit nëse është në konflikt interesit, teksa bashkëshortja e tij është kryetare e e LSI-së, Meta ia ka drejtuar përgjigjen e pyetjes Sokol Ballës, drejtuesit të emisionit “Real Story” në këtë televizon.
“Por të gjithë e dini që Koli nuk ka interes, asnjë konflikt interesi, pavarësisht se nëna e fëmijëve të tij punon në qeveri, kështu që faleminderit për pyetjen me gjykojnë shqiptarët se kush i krijon këto probleme dhe kush do ta nxjerrë Shqipërinë nga rruga e normalitetit, shtetit ligjor”, u shpreh Meta në konferencën për shtyp.
Vetë Balla ka reaguar në profilin e tij në Instagram, ku ka postuar një foto me Metën në vitin 2002, në Kremlin, kur Meta ishte zv.kryeministër. Balla thotë se kreu i shtetit e ka sulmuar dhe kërcënuar atë dhe fëmijët e tij.
“Me Ilir Meten ne Kremlin ne 2002, kur ishte zevendeskryeminister 😉. Sot Presidenti @ilirmeta.faqjazyrtare me sulmoi e kercenoi mua dhe femijet e mi. Por dhe me sfidoi per te ardhur ne emision dhe te perballej me te verteten sipas tij dhe te verteten sipas meje. Ilir! Te pres te enjten ne ora 21 ne #realstory ne @vizionplus. Balle per Balle. Gjithsesi oren zgjidhe vete. Qofte dhe ne 5 te mengjesit. 👐”, shkruan Balla.
Sokol Balla, aktualisht drejtues emisionit “Real Story” në Vizion Plus, ka qenë i martuar me ministren aktuale të Energjitikës dhe Infrastrukturës, Belinda Balluku, por prej disa vitesh janë të divorcuar.