Komisioneri Shtetëror i Zgjedhjeve Ilirjan Celibashi, ka komentuar përplasjet e djeshme në Elbasan dhe incidentin në selinë e FRD. Sipas tij, këto ngjarje po e çojnë procesin drejt një rruge të rrezikshme.
‘Më vjen keq por duhet ta them. Është një qasje që qartazi kontribuon në drejtim të kundërt të asaj që ne të gjithë jemi të angazhuar, të një procesi të rregullt, me standarde evropiane për një proces të lirë, të drejtë dhe të ndershëm. Unë nuk e kam as statujën institucionale për tju drejtuar qoftë Presidentit të Republikës, qoftë kryeministrit apo edhe udhëheqësve të tjerë politikë, por qoftë edhe si qytetar vlen ta them që ka vend për vetëpërmbajtje nga udhëheqësit politikë të të gjitha krahëve sepse sjelljet e tyre, retorikat e tyre ndikojnë drejtpërdrejtë në qasjen e militantëve politikë në lidhje me procesin zgjedhor. Jam i sigurtë që gjithkush e kupton ose secili prej tyre e kupton se sa e rëndësishme është sjellja dhe retorika e tyre politike në raport me standardin e zgjedhjeve. Dhe ajo çfarë humbasin ata dhe humbasim ne të gjithë është më shumë se ajo çfarë ata fitojnë“, u shpreh Ilirjan Celibashi.