Nga 1 Janari 2019, hyri në fuqi ligji për mbylljen e pikave të basteve sportive dhe kazinove elektronike, në të gjithë territorin e vendit.
Vendimi i qeverisë për të mbyllur më 31 dhjetor 2018, në të Shqipërinë, kazinotë elektronike, bastet sportive, sallat e bingove, bastet on line, bastet me gara në pistë, u miratua në fund të muajit tetor, në seancën plenare të Kuvendit me 75 votat pro të mazhorancës, ndërsa opozita nuk mori pjesë në votim.
Hyrja në fuqi e këtij ligji u konsiderua nga opinioni publik si një hap i rëndësishëm për mbrojtjen e fëmijëve, familjeve dhe ekonominë dhe që godet krimin në një nga vatrat e veta më aktive.
Vendimi i qeverisë shqiptare ka tërhequr vëmendjen edhe të mediave italiane, përcjell tirananews.al, të cilat i referohen deklaratës së ministrit të Brendshëm Sandër Lleshaj, në një takim me strukturat e policisë së shtetit ku tha se:
“Që në orën 00:00 të 1 janarit të 2019-ës nuk do të lejohen bastet sportive, lojërat me kalë, apo dhe reklamat për bastet, pasi janë veprimtari të paligjshme. Policia e Shtetit në këtë rast është strukturë në zbatimin e drejtpërdrejt të ligjit. Ndalimi i lojërave të fatit është përgjegjësi e madhe ligjore. Zbatimi i ligjit është një goditje kriminale. Çdo pikë bastesh do të trajtohet si parcelë kanabisi. Përgjegjësi ligjore është ndalimi i lojërave të fati”
Libero.it shkruan se 2019-ta e gjen Shqipërinë pa salla bastesh dhe lojëra fati, ndërsa AgenziaNova.it thekson faktin se policia e shtetit ka rritur rolin e saj në monitorimin e situatës duke marrë masa të rrepta për të gjitha subjektet që nuk e zbatojnë ligjin që ka hyrë në fuqi prej 3 ditësh (që nga 1 janar 2019).
/Tirananews.al
