Ministria e Ekonomisë, Kulturës dhe Inovacionit ka nënshkruar një Memorandum Historik me Këshillin Kombëtar Shqiptar në Serbi, si përfaqësues të shqiptarëve të Luginën e Preshevës. Ministri Blendi Gonxhja, thotë se ky momerandum synon të promovojë trashëgiminë kulturore dhe zhvillimin e inovacionit, si ura të qëndrueshme bashkëpunimi mes institucioneve dhe komunitetit shqiptar në Bujanoc, Preshevë dhe Medvegjë. Gonxhja shprehet se memorandumi u arrit edhe me vëmendjen e veçantë të Kryeministrit Edi Rama. Kjo urë bashkëpunimi mes Shqipërisë dhe shqiptarëve në Luginën e Preshevës do të forcojë diplomacinë kulturore dhe ekonomike shqiptare.
Postimi i plotë
Pas takimeve zyrtare në Luginën e Preshevës, në funksion të zhvillimit të qëndrueshëm kulturor, ekonomik dhe rinor, me vëmendjen e veçantë të Kryeministrit Edi Rama, u nënshkrua sot Memorandumi Historik mes Ministrisë së Ekonomisë, Kulturës dhe Inovacionit të Republikës së Shqipërisë dhe Këshillit Kombëtar Shqiptar në Serbi, si përfaqësues legjitim i shqiptarëve në Luginën e Preshevës.
Ky Memorandum forcon diplomacinë kulturore dhe ekonomike shqiptare, duke hapur rrugë për qasje të përbashkët në politikat, programet dhe iniciativat rajonale. Përmes tij synohet nxitja e nismave të përbashkëta, promovimi i trashëgimisë kulturore dhe zhvillimi i inovacionit, si ura të qëndrueshme bashkëpunimi mes institucioneve dhe komunitetit shqiptar në Bujanoc, Preshevë dhe Medvegjë.
Marrëveshja u nënshkrua në kuadër të Diplo2025, Konferencës së Ambasadorëve, duke i dhënë një dimension të ri diplomacisë shqiptare në shërbim të kulturës, ekonomisë dhe solidaritetit ndërshqiptar.