Kancelarja gjermane Angela Merkel dhe kryeministrja britanike Theresa May kanë biseduar në telefon mbi procesin e Brexit, ka bërë të ditur kabineti i kancelares gjermane, por pa zbuluar detajet.
Zëdhënësi i kancelares Stephen Seibert ka thënë se Merkel dhe May kanë biseduar dje mbi hapat e mëtejshëm, por sipas tij problemi “nuk mund të zgjidhet vetëm me një bisedë telefonike të kancelares dhe kryeministres”.
“E para çfarë na nevojitet është baza e propozimit të ri, drejtimi i ri për të cilin Britania e Madhe ka thënë se do ta definojë të hënën”, ka pretenduar Seibert.
Zyrtarët gjerman kanë thënë se nuk ka ndryshim në qëndrimin e Gjermanisë dhe se është e vështirë të parashikohet hapja e sërishme e negociatave për marrëveshjen mbi Brexit të cilën parlamenti britanik e refuzoi të hënën, dhe se Gjermania pret që Britania e Madhe tashmë të ndërmarrë hapin e rradhës.