Dhimbja është e madhe, por akti i jashtëzakonshëm dhe human i të riut, do të gdhendet përjetë në memorjen e shqiptarëve.
18-vjeçari Anri Kashiku që shpëtoi dy jetë, por humbi betejën me dallgët e Adriatikut, do të përcillet pasditen e sotme për në banesën e fundit. Mes dhimbjes dhe hidhërimit të afërm e bashkëfshatarë kanë mbërritur pranë familjes e cila ka çelur dyert e mortit.
Gjëma që e goditi familjen e ktheu nga Anglia të atin që jetonte dhe punonte atje prej disa vitesh për të siguruar të ardhmen e tre fëmijëve dhe gruas në atdhe.
Anri ishte djali i madh i familjes Kashiku që disa vite më parë u shpërngul nga Librazhdi në periferi të Durrësit, në lagjen ”Mirdita” të Sektorit Rinia.
Në emigracion i ati e konsideronte Anrin shtyllën e shtëpisë. Të gjithë e njohin si një djalë të mbarë, të përgjegjshëm dhe të apasionuar pas futbollit.