Ukrainasit kanë gjetur mënyrën më të bukur për të sfiduar luftën. Në Kiev janë regjistruar 9120 martesa në muajt e parë të pushtimit, tetëfish më shumë se në të njejtën periudhë të vitit 2021. Muajin e kaluar një zyrë e gjendjes civile në kryeqytetin ukrainas pa më shumë se 40 të sapomartuar brenda një dite, shkruan Skynews.
Pse po ndodh ky fenomen?
Duket se është një model i njohur në kohë lufte, pasi njerëzit janë të pasigurt për të ardhmen dhe të detyruar të fokusohen në gjërat që kanë rëndësi. Në kulmin e Luftës së Dytë Botërore në 1942, kishte 1.8 milionë dasma në SHBA – një rritje prej 83% në krahasim me dekadën e mëparshme.
Çiftet ukrainase po përfitojnë gjithashtu nga një thjeshtim i burokracisë rreth martesave që u lejon atyre të martohen aty për aty në vend që të regjistrohen më parë.
“Të martohesh gjatë luftës është hapi më i guximshëm dhe më i vështirë që mund të bësh, sepse kurrë nuk e di se çfarë do të ndodhë më pas”, tha Vitaliy, 25 vjeç, për agjencinë e lajmeve AFP përpara dasmës së tij me Anastasiya 22-vjeçare.
“Unë mund të largohem për në front në çdo moment.”
