Pas 5 viteve si deputete e Partisë Demokratike, këtë të martë Grida Duma dorëzoi mandatin përmes një fjalimi të fortë, emocional dhe me mesazhe të “fshehura”. Ajo thotë se rruga e vetme për maksimizim është bashkimi i PD-së, si edhe që lënia e mandatit është edhe një model që në të ardhmen mund të ndryshojë ujërat e ndenjura që durojmë të gjithë me kompromise. Se për çfarë kompromisesh foli Duma, këtë nuk e tregoi hapur.
Nga grupi parlamentar i PD-së ikën dy deputetë me personalitet dhe integritet. Grida Duma dorëzoi mandatin sot në një konferencë shtypi me akuza ndaj politikës dhe kulisave. Mbrëmë Alfred Rushaj, pa zhurmë të madhe dorëzoi mandatin.
Ikja nga politika aktive e të dyve është humbje për demokratët. Alfred Rushaj nuk njihet si politikan karizmatik, por është një nga profesionalistët me të zotë në Shqipëri. PD gjithnjë e me shumë po rrënohet godina historike e PD, e cila dikur rrëzoi pushtetin komunist, kurse tani po ha themelet e veta.
Pjesë nga fjalimi
Megjithatë nuk e kam lënë dhe nuk e kemi lënë betejën me miq, kolegë të vyer e demokratë edhe kur kemi vijuar fushatat pa mjete, atëherë kur vendimet e gabuara të lideshipit nga lënia e mandateve te lënia e bashkisë e lodhën e gërryen forcën madhore të PD. U quajt besnikëri dhe lojalitet atëherë që mbështetëm atë që vetë nuk e aprovova, e megjithatë i qëndruam me lojalitet vendimet të shumicës.
Para dhe pas 6 marsit, në situatën më të vështirë kam bërë sa munda që PD të kishte krah saj aleatin më të madh në gjenezën e vet, aleatin strategjik SHBA. Vijoj të mendoj se duhet ta ketë aty përkrah. Në themelin e vet aleatin strategjik SHBA. Vijoj të mendoj që duhet ta ketë përkrah. Ashtu siç kam që pas 6 marsit të bëj gjithçka, madje duke dhënë dorëheqjen për të vlerësuar solidaritetin dhe njohjen njerëzore që demokratët treguan për të vlerësuar liderin historik, duke ndjekur dinjitetin njerëzor më tepër se pazaret politike. Dita ta njoh edhe këtë realitet. Ishte një përpjekje për të mbajtur balancat, për të qetësuar konfliktet, për të arsyetuar për të mirën e demokratëve.
Sot para zgjedhjeve lokale nuk jemi në një realitet që nuk e dimë, maksimizimi i PD nuk ka ndodhur, sot nuk jemi dje, nuk jemi një vit më parë kur shoku mendor që na erdhi nga SHBA, na dha një traumë politike. Sot kuptojmë shumë më shumë nga mësimet që nuk i kërkuam, por arritëm ti mbanim, rruga e vetme për maksimizim është bashkimi. Lënia e mandatit tim është moslënia e përgjegjësisë që i njoh vetes. Nëse nuk bëra dot që të mos ndodhë një 6 mars i dytë, do të thotë që duhet të di të bëj duke dhënë një model që ndoshta sot dhe në të ardhmen ndryshon për ujërat e ndenjura që durojmë të gjithë me kompromise.
Mund të akomodohesha në komoditete personale, por një gjë është e sigurt që mendoj se duhet të bëjmë më shumë për fitore reale. PD sot dhe gjithmonë është jo vetëm opozita shqiptare, është përcaktuese e fateve të shqiptarëve këtu, por vendimet e PD-së përcaktojnë fatet e shqiptarëve kudo në Ballkan. Shqiptarët në Shqipëri, Kosovë, Maqedoni, Preshevë e Mitrovicë do pësojnë efektet zinxhir të vendimeve që PD merr sot.
Kemi detyrën të bëjmë dhe të zgjedhim atë që i shërben më shumë vendit, forcave që përcaktojnë fatin e shqiptarëve dhe për këtë më takon të vendos atë që bëj unë dot më mirë dhe shërben më shumë në të ardhmen.