Lionel Mesi, në fjalimin pasi fitoi për herë të 8 trofeun e “Topit të Artë”, nuk ngurroi të tregonte edhe ata të cilët sipas tij do të ishin emrat që do të luftonin për këtë trofe në vitet në vijim. Argjentinasi sigurisht i referohej dyshes Haland-Mbape që e ndoqën në renditjen e përgjithshme të këtij edicioni dhe ishin konkurrentë të fortë.
“Nuk do të rri pa përmendur Haland e Mbape, kishin një vit spektakolar. Mbi të gjithë Haland. Nuk kam dyshime që do ta fitojnë këtë çmim. Shohim shumë të rinj këtu në sallë dhe do t’i gëzohemi futbollit të tyre gjatë gjithë viteve. Lojtarët po rinovohen, por niveli nuk bie kurrë”, tha fillimisht Mesi, i cili iu drejtua pikërisht dyshes së sulmuesve që kishte përballë në sallë.
“Do të jetë një luftë e bukur mes tyre dhe shumë të rinjve të tjerë që ka këtu. Të dy e kishin merituar këtë vit. Erling, ky mund të ishte i yti, dhe në mënyrë perfekte mund të kishte qenë i yti”, pranoi Mesi para norvegjezit.