Leo Messi i zgjat dorën PSG-së, duke i kërkuar falje klubit dhe shokëve të skuadrës për udhëtimin e paautorizuar në Arabi që i kushtoi atij dy javë pezullim pa pagesë.
“Përshëndetje, mirë, doja ta bëja këtë video për atë që po ndodh. Para së gjithash, sigurisht që dua t’u kërkoj falje shokëve të skuadrës dhe klubit,” tha ylli argjentinas në një Story në Instagram.
“Sinqerisht mendova se do të kishim një ditë pushimi pas ndeshjes si gjithmonë. E kisha rregulluar këtë udhëtim në Arabi të cilin e kisha anuluar më parë dhe nuk mund ta anuloja më. Dhe asgjë, e përsëris, kërkoj falje për atë që kam bërë dhe pres vendimet e klubit. Asgjë më shumë, një përqafim”.
Messi, pas nokautit kundër Lorientit, fluturoi në Arabinë Saudite për arsye komerciale, duke injoruar stërvitjen ndëshkuese të vendosur nga klubi dhe Galtier pas paraqitjes së keqe të së dielës. Një sjellje që tërboi drejtuesit të cilët vendosën të përdorin një grusht të fortë, duke e pezulluar kampionin argjentinas për dy javë në një moment delikat të sezonit.
Parizienët në fakt janë në syrin e tifozëve për sezonin zhgënjyes dhe 5 ditë nga fundi e gjejnë veten me vetëm 5 pikë përpara Marsejës së vendit të dytë. Lojtarëve të shumtë të lënduar tashmë i shtohet edhe mungesa e Messit, gjë që e vështirëson punën e Galtier. Kush e di nëse tani justifikimet do ta përshpejtojnë rikthimin e tij në ekip, ndoshta që në javën e ardhshme.
E sigurt është që rrugët e “Pleshtit” dhe PSG do të ndahen në fund të sezonit. Pa shumë keqardhje për një dashuri që nuk lulëzoi kurrë plotësisht.