Kreu i shtetit Ilir Meta bën lëvizjen e radhës përsa i përket çështjes së Teatrit Kombëtar. Zyra e shtypit e Presidencës bën të ditur se presidenti do të dorëzojë sot në 13.00 në këtë Gjykatë kërkesën për të shpallur antikushtetues ligjin për shembjen e godinës së Teatrit Kombëtar.
Meta e ktheu këtë ligj fiks një vit më parë në Kuvend, dhe pas disa ndryshimeve që u bënë, e riktheu për herë të dytë në tetor të vitit të shkuar.
Kujtojmë se në atë kohë, Meta vlerësoi se ligji paraqet sërish probleme kushtetuese, pasi sipas Presidentit, në thelb dispozitat e tij përmbajnë kritere diskriminuese që nuk garantojnë konkurencën e lirë, por përkundrazi, sërish konstatohet një trajtim preferencial që kufizon pjesëmarrjen në garë.
Konstatimet e vërejtura – vijon më tej Meta, e bëjnë këtë ligj të bjerë sërish ndesh me zbatimin e parimeve kushtetuese të “barazisë përpara ligjit” dhe “lirisë së veprimtarisë ekonomike të shtetasve”, duke cenuar funksionimin e vet shtetit të së drejtës.
Në këtë mënyrë në tërësi ligji i ri nr.37, datë 20.09.2018, paraqet të njëjtat probleme kushtetuese të evidentuara nga Presidenti i Republikës në dekretin e tij, duke e bërë atë të padekretueshëm për shpallje.
Presidenti i Republikës iu kujton ligjvënësve edhe faktin e monfunksionimit të Gjykatës Kushtetuese, e cila mund të jepte një vendim përfundimtar lidhur me procesin legjislativ. Kreu i shtetit ka arritur në përfundimin se vendimin e mori pasi në tavolinën e tij të punës mbërriti një ligj i ri dhe për këtë arsye kërkesa e Kuvendit duhet të pranohet për shqyrtim nga Presidenti i Republikës.