Kreu i Partisë së Lirisë, Ilir Meta deklaroi se për zgjedhjet vendore do të bashkëpunojë me të gjithë faktorët e opozitës, ndërsa mohoi çdo mundësi bashkëpunimi me kryeministrin Edi Rama.
I ftuar në emisionin “Kontrast”, ish-presidenti u ndal edhe të lideri i të djathtës, Sali Berisha, të cilin e krahasoi me Cristiano Ronaldo. “Pavarësisht moshës, është në formën më të mirë”, u shpreh Meta.
“Këto janë në kuadrin e diversioneve të Rilindjes. Një politikan që u shfaq si Lulzim Basha kishte energji vetëm për të gënjyer dhe jo për të mbajtur premtimet. Për të parë interesin e tij personal dhe jo kombëtar, jo forcës politike që trashëgoi. Dihet që në rastin e zotit Berisha, është si të flasim për moshën e Ronaldos ndërkohë që është më në formë se kushdo tjetër. Qëllimi im nuk është as të kthehem në politikë aktive, as për të marrë lidershipin e opozitës. Qëllimi im është përmbushja e një misioni që jam thërritur. Më ka thërritur 25 prilli. Unë në 26 e kam bërë të qartë se kur të mbaroj mandatin do rikthehem. 25 prilli ishte akti final për shuarjen e pluralizmit politik në Shqipëri. Do bashkëpunoj me të gjithë faktorët e opozitës, që nuk duan të jenë peng e një shteti që nuk ekziston. Sot kemi parë vogëlush dhe parashkollorë që dolën në grevë përpara Kryeministrisë. Fëmijë që prindërit kanë paguar lekët për një kopsht model. Ai në mënyrën më arbitrare i nxjerr ata në rrugë. Skenat që kemi parë sot kanë qenë tronditëse.”