Meta njoftoi largimin e 11 mijë punonjësve ose afro 13% të fuqisë punëtore të kompanisë, pasi po përballet me probleme dhe pasiguri në të ardhurat vjetore, si dhe probleme tjera të industrisë së teknologjisë.
Mark Zuckerberg zbuloi lajmin në një postim në blog, duke thënë se ishte faji i tij që ka qenë tepër optimist për të ardhmen e kompanisë bazuar në rritjen që solli pandemia.
“Në fillim të COVID bota u zhvendos me shpejtësi online duke forcuar industrinë e-commerce dhe nisur një rritje të ardhurash,” tha Zuckerberg.
“Shumë besuan se kishim të bëjmë me një rritje e cila do të ishte e përhershme dhe të vijonte edhe pas pandemisë. Edhe unë kështu besoja, kështu mora vendimin të rrisim investimet. Për fat të keq kjo nuk përfundoi ashtu siç e kishim pritur.”
Zuckerberg tha se kompania tashmë do të bëhej më efikase duke shkurtuar shpenzimet dhe stafin dhe zhvendosur më shumë resurse drejt hapësirave me rritje si reklamimi, inteligjenca artificiale dhe metaverse.