Në sajë të vizitës zyrtare 2-ditore në Bullgari, Presidenti Ilir Meta zhvilloi një takim me Kryetarin e Asamblesë Kombëtare të Republikës së Bullgarisë, Nikola Minchev. Në këtë takim, Meta dhe Minchev diskutuan mbi rëndësinë e forcimit të dialogut politik ndërparlamentar dhe fuqizimit të bashkërenditjes mes Grupeve të Miqësisë në konkretizimin e politikave dhe projekteve qeverisëse, si në rrafshin dypalësh, ashtu edhe në atë rajonal.
Në fjalën e tij, Presidenti shqiptar, Ilir Meta nënvizoi se krijimi i një rrjeti dinamik ndërparlamentar mes Italisë, Shqipërisë, Maqedonisë së Veriut dhe Bullgarisë për të mbështetur dhe jetësuar realizimin e Korridorit VIII, si një aks i rëndësishëm gjeostrategjik, do të ishte hapi i duhur në kohën e duhur. Zhvillimet e reja e bëjnë edhe më të domosdoshëm dhe imediat rivitalizimin dhe përshpejtimin e Korridorit VIII, jo vetëm si një korridor zhvillimi midis Detit Adriatik dhe Detit të Zi, por edhe si një korridor sigurie.
Ndaj është i domosdoshëm bashkëpunimi i përhershëm edhe në nivel parlamentar të tre vendeve tona, por edhe të Italisë dhe vendeve të tjera të Bashkimit Europian për të nxitur Qeveritë tona dhe institucionet ndërkombëtare në konkretizimin e projekteve, që përshpejtojnë proceset integruese në rajon. Bullgaria, duke qënë edhe një vend anëtar i Bashkimit Europian, do të luajë një rol të rëndësishëm në këtë kuadër.
“Bashkëpunimi ndërparlamentar ka një rol të pazëvendësueshëm, nxitës dhe jetësor në përshpejtimin e procesit të integrimit në Bashkimin Europian të Shqipërisë, Maqedonisë së Veriut dhe të të gjitha vendeve të Ballkanit Perëndimor”, deklaroi Presidenti Meta.
