Presidenti Ilir Meta ndodhet në një vizitë në Stamboll, ku u prit nga drejtuesit e shoqatës “Vatra” dhe qindra bashkëkombës të diasporës të vjetër dhe të re në Turqi.
Kreu i Shtetit u shpreh se diaspora e hershme dhe e re shqiptare në Turqi është krenari që përfaqëson vlerat tona më të mira kombëtare.
Duke vlerësuar kontributin që shqiptarët kanë dhënë në Turqi, Meta u shpreh se komuniteti ynë është integruar më së miri, duke arritur suksese në shumë fusha.
“Diaspora e hershme dhe e re shqiptare në Turqi është krenari që përfaqëson vlerat tona më të larta kombëtare. Shumë i lumtur që ndodhem në Stamboll mes bashkëkombësve dhe drejtuesve të shoqatës “Vatra” për të vlerësuar kontributin e tyre të pazëvendësueshëm në promovimin e traditës kombëtare, kulturës, historisë, dhe trashëgimisë shqiptare. Shqipëria dhe Turqia gëzojnë marrëdhënie të gjata e të ngushta miqësore. Këto marrëdhënie do të qëndrojnë të tilla sepse në themel të tyre është miqësia dhe lidhja e ngushtë ndërmjet popujve tanë, ku diaspora shqiptare ka një rol të pazëvendësueshëm.”, shkruan Meta.