Ekonomia ka vijuar trendin pozitiv në administrimin e financave publike gjatë periudhës janar- tetorit 2025, me të ardhura që kapën shifrën e 628 miliardë lekë dhe shpenzime në nivelin 578,8 miliardë lekë.
Referuar të dhënat të publikuara sot nga Ministria e Financave mbi treguesit fiskalë, të ardhurat totale për 10-mujorin 2025, arritën në rreth 628 miliardë lekë, një realizim në masën 99,7 % të planit të periudhës. Krahasuar me të njëjtën periudhë të një viti më parë, u mblodhën rreth 37,7 miliardë lekë më shumë ose 6,4 % më shumë.
Të ardhurat e arkëtuara nga Tatimet dhe Doganat, për periudhën janar-tetor 2025, janë në shumën 413,7 miliardë lekë, rreth 39 milionë lekë më shumë se plani i periudhës dhe 34,3 miliardë lekë më shumë në periudhën janar–tetor 2024.
Shpenzimet e përgjithshme publike, për periudhën 10-mujore të vitit 2025, arritën në rreth 578,8 miliardë lekë me një realizim në masën 96,2% të planit të periudhës, ndërsa krahasuar me të njëjtën periudhë të vitit 2024 ky zë ka rezultuar 11,5% më i lartë ose rreth 59,6 miliardë lekë më shumë.
Shpenzimet korente kapën shifrën 511,3 miliardë lekë, me një rritje 10,4% ose rreth 48,2 miliardë lekë më shumë. Shpenzimet kapitale rezultuan në rreth 66,4 miliardë lekë ose 18,7% më shumë se viti i kaluar dhe me një realizim 83,3 % ndaj planit të parashikuar.
Referuar të dhënave, suficiti fiskal për këtë periudhë llogaritet në 49,2 miliardë lekë ose 30,7% më i ulët se viti i kaluar ose rreth 21,8 miliardë lekë më pak.