Milani është ndalur në shtëpi në një barazim pa gola përballë Bolonjës, duke lënë pikë shumë të rëndësishme në rrugën drejt titullit kampion.
Skuadra e Stefano Piolit, duhej t’u përgjigjej triumfeve të Napolit dhje Interit ndjekës, por ka zhgënjyer më shumë se 68 mijë të pranishëm në “San Siro” të cilët kanë parë kuqezinjtë në një ditë jo të mirë. Bolonja nuk drejtohej nga Sinisha Mihajloviç i sëmurë, por nga ndihmësi i tij Miroslav Tanjga, pasi tekniku aktualisht është i shtruar në spital për terapi ndaj leukemisë.
Megjithatë, skuadra mike bëri gjithçka që të mos ndjehej mungesa e teknikut, me një lojë të vëmendshme mbrojtëse sidomos në pjesën e parë ndërsa rrezikoi edhe Menja me gjuajtjet e Barrou. Pjesa e dytë foli më shumë për kuqezinjtë, të cilët tentuan me radhë të shënonin, por Skorupski ishte i pakalueshëm deri në sekondat e fundit, duke siguruar portën e paprekur deri në fund dhe duke marrë një barazim që duket si fitore për Bolonjën e një disfatë për Milanin që humbi pikë të rëndësishme.
MILAN-BOLONJA 0-0
FORMACIONET ZYRTARE
MILAN (4-2-3-1): Menja; Kalabria, Kalulu, Tomori, Teo Hernandez; Tonali, Benaser; Mesias, Brahim Diaz, Leao; Zhiru.
BOLONJA (3-5-2): Skorupski; Sumaoro, Medel, Teate; Hikei, Ebisher, Shuten, Svanberg, Dijks; Arnautoviç, Barrou.