Ministrat Sandër Lleshaj e Anila Denaj, Prefekti i Dibrës Nexhbedin Shehu, kryetarët e bashkive Mat, Bulqizë e Dibër, Agron Malaj, Lefter Alla, Dionis Imeraj dhe banorë të zonës morën pjesë në prezantimin e projektit të asfaltimit të segmentit 42 km, Perlat-Lurë.
Prefekti nënvizoi se kryeministri premtoi para lurjanëve shtrimin e rrugës me asfalt dhe tani po prezantojmë projektin që do të sjellë zhvillim në disa drejtime të kësaj treve të njohur.
Në fjalën e saj ministrja Denaj theksoi se shpreson në zhvillimin e kësaj zone.
“Me investimet në këtë zonë synojmë të rikthejmë në këtë vend të bukur banorët e ikur për shkaqe të ndryshme. Angazhimi ynë është të ndërhyjmë në infrastrukturë. BE dhe BERZH na kanë akorduar 100 milion euro për këtë qëllim. 40 milion janë grande. Për ndërtimin me asfalt të rrugës Perlat-Kurbnesh-Lurë nevojiten 23 milion euro. Gjatë vizitave që pata në disa familje kuptova se këtu mund të zhvillohet zejtaria, pasi është një vend me tradita të veçanta”, tha ministrja Denaj para banorëve të Lurës.
Ndërsa ministri Lleshaj u ndal në zhvillimin ekonomik të kësaj treve. Ai tha se turizmi do të bënte që etja e disa viteve më parë për të ikur nga vendlindje të kthehet në dëshirë dhe etje për t’u rikthyer në Lurë.
“Rikthimi në trashëgiminë kulturore dhe kultivimi i traditave të mëhershme do të ndikonte në ripopullimin e Lurës. Me rëndësi është ringritja e kullave të kësaj krahine. Kulla dhe veshjet e Lurës janë të veçanta, të rralla, unike në llojin e vet. Po ashtu ka shumë rëndësi të ndalet dëmtimi i mjedisit, pyjeve. Ato duhen mbrojtur nga prerjet dhe zjarret. Liqenet e Lurës dhe Kroi i Bardhë janë adresa turistike të mrekullueshme”, u shpreh ministri Lleshaj.
Banorët nga ana e tyre falenderuan qeverinë për premtimin e mbajtur dhe kërkuan ndërhyrje edhe në rrjetin elektrik, pasi aktualisht përballen me vështirësi të shumta.
