Pas një vizite dy ditore në Athinë ku zhvilloi takime me 3 ministra të kabinetit qeveritar atje që mbulojnë emigracionin, çështjet e brendshme, qeverisjen lokale dhe policinë, Ministri i Brendshëm Bledi Çuçi tha se mori garanci nga ata se emigrantët shqiptarë do të kenë një trajtim të veçantë në zyrat e emigracionit grek.
“Nga ministri për Migracionin dhe Azilin mora premtimin se komuniteti shqiptar në Greqi do të marrë një trajtim të veçantë përsa i përket lejeve të qëndrimi dhe në përgjithësi të gjithë trajtimit në zyrat e emigracionit këtu në Greqi. Vendosëm një komunikim direkt për cdo shqetësim të shqiptarëve nëpërmjet ambasadores tonë në Athinë”, tha ministri Çuçi.
Ndërkaq, sa i takon Ministrit të Mbrojtjes së Qytetarit, ku përfshihen edhe çështje të policisë, Çuçi deklaroi se biseduan për intensifikim të bashkëpunimit policor dhe operacione të përbashkëta që adresojnë luftën kundër krimit të organizuar dhe terrorizmit. Çuçi u shpreh se niveli i besimit mes dy palëve kur vjen puna te bashkëpunimi policor është në nivelet më të larta.
“Me Ministrin e Brendshëm biseduam për sfidat e përbashkëta që kemi në lidhje me funksionimin e bashkive apo qeverisjes vendore në secilën nga vendet tona. Gjithashtu ramë dakord që strukturat përkatëse të ministrive bashkë me strukturat e bashkive kufitare me Greqinë të bashkëpunojnë për të përfituar nga programet e financuara nga BE”, deklaroi Çuçi.
Mes të tjerash, Ministri i Brendshëm i Shqipërisë zhvilloi po ashtu një takim me kryebashkiakun e Athinës, Kostas Bakoyannis, i cili tregoi edhe përpjekjet që po bën për hapjen e një qendre kulturore shqiptare në kryeqytetin grek.