Modernizimi i infrastrukturës së komunikimeve elektronike në territorin e bashkive ishte në fokus të një takimi të zhvilluar këtë të martë mes përfaqësuesve të pushtetit vendor dhe autoriteteve përgjegjëse. Vëmendje e veçantë iu kushtua sistemimit të kabllove ajrore dhe eliminimit të strukturave të improvizuara që ndikojnë negativisht në pamjen urbane.
Ky proces synon kalimin gradual drejt infrastrukturës nëntokësore, duke krijuar standarde të reja në zonat ku do të ndërhyhet dhe duke përmirësuar cilësinë e hapësirave publike në qytetet e vendit.
Ministri Ervin Demo theksoi se bëhet fjalë për një proces afatgjatë, por të domosdoshëm në rrugën e Shqipërisë drejt standardeve europiane.
“Ky është një proces gradual, por në çdo zonë ku do të ndërhyhet qëllimi është të vendosim një standard të ri. Duhet parë si një aset, pasi për bashkitë mund të gjenerojë të ardhura, ndërsa për qytetin përfituesit kryesorë do të jenë qytetarët. Ata do të jetojnë në qytete me standarde të një vendi që po përgatitet të bëhet pjesë e Bashkimit Europian. Këtu luajnë rol edhe bashkitë. Sfida jonë është të kemi projekte të mirëpërgatitura dhe të financuara. Bashkitë duhet të jenë aktorë aktivë në përthithjen e fondeve nga BE”, deklaroi ministri Demo.
Sipas ministrit, bashkitë kanë një rol të rëndësishëm në këtë transformim, si në hartimin dhe zbatimin e projekteve, ashtu edhe në sigurimin e mbështetjes financiare nga fondet e Bashkimit Europian.
Nisma synon krijimin e qyteteve më funksionale, më të organizuara dhe më tërheqëse për qytetarët, duke ndihmuar njëkohësisht në përmbushjen e standardeve që kërkon procesi i integrimit europian.