Ministri për Evropën dhe Punët e Jashtme, Ferit Hoxha, zhvilloi një takim në Romë me Piero Fassino, zëvendëspresident i Komitetit të Mbrojtjes në Dhomën e Deputetëve të Italisë dhe president i Komitetit të Ballkanit në Asamblenë Parlamentare të Këshillit të Evropës.
Gjatë takimit u diskutua për ecurinë e Shqipërisë në procesin e integrimit në Bashkimin Evropian, reformat e ndërmarra dhe hapat që mbeten për mbylljen e kapitujve të negociatave. Hoxha theksoi angazhimin e vendit për të përparuar drejt anëtarësimit në BE brenda kësaj dekade.
Bashkëbiseduesit vlerësuan zgjerimin e BE-së si një nga politikat më të suksesshme të unionit dhe nënvizuan rëndësinë e ruajtjes së stabilitetit në Ballkanin Perëndimor.
Ata ranë dakord se momenti aktual paraqet një mundësi të rëndësishme për vendet e rajonit që të avancojnë drejt integrimit evropian përmes reformave, dialogut dhe bashkëpunimit.
Postimi i Ferit Hoxhës
Romë – Kënaqësi që u takova me të nderuarin Piero Fassino, Zëvendëspresidentin e Komitetit të Mbrojtjes të Dhomës së Deputetëve të Republikës Italiane, si dhe President i Komitetit të Ballkanit të Asamblesë Parlamentare të Këshillit të Evropës, një mik i Shqipërisë dhe popullit shqiptar, dhe një mbështetës aktiv dhe i palodhur i integrimit Europian të Ballkanit Perëndimor.
Progresi i Shqipërisë në procesin e pranimit në BE, angazhimi ynë i palëkundur për zbatimin e reformave ambicioze, përfundimi me sukses i standardeve që çuan në miratimin e IBAR, dhe puna që na pret drejt mbylljes së kapitujve negociues ishin në qendër të diskutimit tonë miqësor dhe produktiv.
Gjithashtu shkëmbyem mendime mbi ritmin dhe afatet kohore të procesit të zgjerimit, duke riafirmuar rëndësinë e ruajtjes së momentumit aktual dhe për të përparuar me vendosmëri drejt objektivit tonë strategjik për përfundimin e negociatave brenda kësaj dekade. Ky nuk është vetëm një prioritet kombëtar, por edhe përmbushja e aspiratës europiane që breza të tërë shqiptarësh e kanë mbartur dhe punuar për shumë vite.
Ne ramë dakord që zgjerimi mbetet një nga politikat strategjike më të suksesshme të Bashkimit Evropian, e aftë të nxisë transformimin, stabilitetin dhe prosperitetin.
Gjithashtu shkëmbyem mendime mbi dinamikën aktuale në Ballkanin Perëndimor, duke nënvizuar rëndësinë e ruajtjes së stabilitetit rajonal, forcimit të marrëdhënieve të fqinjësisë së mirë dhe avancimit të integrimit evropian të të gjithë rajonit. Në një mjedis gjeopolitik gjithnjë e më kompleks, një rajon i sigurt, i qëndrueshëm dhe i begatë është një imperativ strategjik për sigurinë, unitetin dhe besueshmërinë e Evropës në tërësi.
Ne ramë dakord që momentumi i ripërtërirë i zgjerimit të BE-së përfaqëson një mundësi historike që duhet të shfrytëzohet nga të gjitha vendet e rajonit përmes reformave, dialogut dhe bashkëpunimit të zgjeruar rajonal.